Pas ndryshimeve të fundit në kabinetin qeveritar nga Kryeministri Rama, qeveria aktuale nuk ka asnjë ministër që është me origjinë nga Veriu i vendit. Largimi i Sandër Lleshajt me origjinë nga Mirdita dhe Gent Cakajt nga Kosova ka bërë që si rrallë herë në këto 30 vite të pluralizmit qeveria të mos ketë asnjë përfaqësues nga Veriu. Ka pasur vetëm një precedent, në qeverinë e Fatos Nanos në prillin 1998 kur largoi Shaqir Vukajn si ministër dhe e bëri qeverinë nga zonat si Tirana e poshtë. Ndërkohë që në qeverinë e para pas 2013-ës, Rama kishte Ditmir Bushatin, Ilir Beqajn, Mimi Kodhelin, Lindita Nikollën, e në vijim solli, Ylli Manjanin, më pas Sandër Lleshajn, madje e çoi më tej këtë përfaqësim me dy ministra nga Kosova si Besa Shahini dhe Gent Cakaj. Tashmë qeveria aktuale i ka të gjithë ministrat të lindur në Tiranë dhe me origjinë nga Jugu. Vetëm ministrja e Drejtësisë, Etilda Gjonaj ka një lidhje me Pukën, por që është jo shumë e fortë dhe vetëm kalimtare. Ajo vetëm ka lindur në këtë qytet. Vetë Kryeministri lindur e rritur në Tiranë, si origjinë i përket jugut të vendit. Numri dy Erion Braçe, gjithashtu i lindur në Tiranë është nga Berati me origjinë. Ministrja Olta Xhaçka e lindur nëTiranë dhe me origjinë nga Korça, Ministri i Brendshëm, Bledi Çuçi me origjinë nga Gjirokastra, kurse Anila Denaj nga krahina e Vlorës. Belinda Balluku, ministre e Energjetikës, është një tiranase me taban. Elva Margariti ka lindur në Tiranë, Milva Ekonomi, ka lindur në Tiranë me origjinë nga Durrësi. Arben Ahmetaj është lindur në Gjirokastër, Ogerta Manastirliu ka lindur në Tiranë, por origjinën e ka nga Korça. Blendi Klosi ka lindur në Tiranë dhe origjinën e ka nga Mallakastra. Pandeli Majko ka lindur në Tiranë por origjinën e ka nga Gjirokastra. Eduard Shalsi, ka lindur Korçë. Ku dhe ka lindur edhe i rikthyeri në qeveri Niko Peleshi. Ministrja Elisa Spiropali është gjithashtu me origjinë nga qarku i Gjirokastrës.