Ndryshimet për Kodin Rrugor të vendit që pritet të miratohen deri në mbyllje të legjislaturës parlamentare, shihen me skepticizëm nga ekspertët. Drejtuesi i konfidustrisë, Gjergj Buxhuku përmes një reagimi i ka kërkuar Kuvendit që të mos i miratojë këto ndryshime ku parashikohet sanksionimi i penalitetit automatik për mbi 500 mijë, qytetarë dhe biznese zotërues të automjeteve, që nuk kryejnë sigurimin e detyrueshëm brenda një afati kohor 30 ditor nga skadimi i të mëparshmit. Sipas tij ky ndryshim i rëndësishëm ligjor po kalon pa asnjë debat publik dhe po miratohet në një kohë që përkon me fundin e legjislaturës dhe kulmin e fushatës zgjedhore. “ Mënyra sesi është zhvilluar gjithë procesi legjislativ i deritashëm dhe koha e zgjedhur janë të shprehje të mundësisë për prannë e kapje e shtetit si shkalla më e lartë e korrupsionit. Konfindustria vlerëson, se në parim eshtë krejt e papranueshme, që tejkalimi i afatit 30 ditor të sigurimit të penalizohet edhe në kushtet kur automjetet nuk dalin në rrugë. Aq më shumë në kushtet e pandemisë së Covid 19 kur afate të tilla janë plotësisht të mundshme për tu tejkaluar nga qytetarët për arsye shëndetësore pa përmendur arsyet financiare. Edhe më e rëndë paraqitet gjëndja për bizneset. Bizneset, që kanë numër të madh automjetesh dhe makinerish do të jenë të detyruar të paguajnë siguracione edhe nëse mjetet e tyre për arsye të mungesës së punës janë të mbyllur”, thuhet në deklaratën e kreu të konfindustrisë. Sipas tij kuvendi dhe autoritete rregullatore më së shumti duhet të ishin marrë me menyrën sesi është ndërtuar dhe funksionon tregu i sigurimeve në Shqipëri. “Tregu i sigurimeve ka shenja të qarta të organizimit në formë karteli të pastër, me cmime policash të fiksuara me platforme unike teknologjike, pa konkurencë ndërmjet operatorëve dhe asnjë licencë të re të dhënë në vite për operatorë të rinj. Pasojat janë të dukshme te qytetarët dhe bizneset ku mjafton të përmendim, se pagesa për prime të siguruara në Shqipëri është të paktën 60% me e ulët, se në Kosovë, pa përmendur vende të tjera të rajonit”, përfundon reagimi I Buxhukut.