Gazetarja dhe drejtuesja e njohur e emisionit televiziv “Ditari” të Zërit të Amerikës, Rudina Dervishi është ndarë nga jeta të martën në moshën 53-vjeçare, pas një beteje dyvjeçare me kancerin e gjirit. Lajmin e ka bërë të ditur vëte Shërbimit Shqip i Zërit të Amerikës, ku shkruan: Për më shumë se 25 vjet, Rudina dha një kontribut të çmuar me profesionalizmin e saj si një gazetare e apasionuar, duke mbuluar tema të shumëllojshme nga ekonomia, politika, të drejtat e njeriut dhe të gruas, e deri tek arti. Ne, kolegët e saj të Zërit të Amerikës, do ta mbajmë mend Rudinën për mprehtësinë, dinamikën, humorin dhe përkushtimin e saj. Ajo la pas bashkëshortin, tre djemtë dhe nënën. Për ndarjen nga jeta të gazetares së njohur ka reaguar edhe presidenti Bajram Begaj, ku u shpreh ngushëllime familjarëve të saj. “Me keqardhje mësova për ndarjen e parakohshme nga jeta të gazetares së seksionit shqip të 'Zëri i Amerikës', znj. Rudina Dervishi. Gjatë 25 viteve të karrierës së saj në këtë medium, ajo u shndërrua në një figurë të dashur për shqiptarët anembanë botës. I shpreh ngushëllimet më të thella familjes së saj, bashkëpunëtorëve dhe miqve të shumtë që ajo fitoi me zërin e saj të ngrohtë si gazetare dhe drejtuese e emisionit 'Ditari'.”, shkruan Begaj në rrjetet sociale.