NATO duhet të jetë gati për luftë në katër vitet e ardhshme, paralajmëroi shefi i mbrojtjes i Gjermanisë, pasi pretendoi se Rusia po përgatitet të sulmojë më shumë vende evropiane. Gjenerali Carsten Breuer tha se NATO po përballet me një "kërcënim shumë serioz" nga Rusia, më i rëndi që ai ka parë në 40 vitet e tij të shërbimit. Breuer shpjegoi se Rusia po prodhon armë me një ritëm të shpejtë, me rreth 1,500 tanke beteje dhe katër milionë fishekë artilerie çdo vit. Çështja kryesore është se jo të gjitha këto po dërgohen apo përdoren në Ukrainë, e ndoshta kjo tregon se municionet po grumbullohen për t'u përdorur kundër vendeve të NATO-s. "Ka një qëllim dhe ka një grumbullim të rezervave", thotë ai. Breuer e përforcoi paralajmërimin e tij duke thënbë se "analistët po vlerësojnë vitin 2029" si afatin kohor të mundshëm të Rusisë për një sulm, duke përfunduar: "Duhet të jemi gati deri atëherë". "Nëse më pyesni tani, a është kjo një garanci që nuk do të ndodhë dicka më herët se viti 2029? Do të thoja jo, nuk është. Pra, duhet të jemi në gjendje të luftojmë që tani", tha ai. Në prill, gjenerali paralajmëroi se Putini do të ketë grumbulluar një ushtri prej 3 milionë trupash deri vitin e ardhshëm dhe se ai dëshiron të "dobësojë dhe shkatërrojë NATO-n si aleancë dhe të diskreditojë formën perëndimore të shoqërisë". Shtetet baltike; Lituania, Letonia dhe Estonia janë veçanërisht të prekshme, sipas ekspertit të mbrojtjes. Estonezët përdorin analogjinë e të qenit afër një zjarri të egër dhe të qenit në gjendje të "ndjesh nxehtësinë, të shohësh flakët dhe të nuhasësh tymin". Gjenerali bëri thirrje për veprim, duke u kërkuar vendeve të tjera të NATO-s të rindërtojnë ushtritë e tyre.