Polonia ka filluar ndërtimin e një muri përgjatë kufirit të saj me Bjellorusinë për të ndaluar hyrjen e emigrantëve të paligjshëm. Muri do të jetë pesë metra e gjysmë i gjatë, do të shtrihet në 186 km gjatësi dhe do të kushtojë 350 milionë euro për tu ndërtuar. Polonia dhe Bjellorusia, ndajnë në total 418 km kufi. Një zëdhënës i rojave kufitare, refuzoi të tregonte vendin ku do të ngriheshin kantieret e ndërtimit duke argumentuar se nëse do ta bënte këtë shërbimet bjelloruse do të nisnin emigrantët drejt tyre ndaj për arsye sigurie, projekti do të mbahej i fshehtë. Rrethimi i ri do të pajiset edhe me kamera dhe me detektorë lëvizjesh. Në kufirin me bjellorusinë ekziston në fakt një rrethim me tela me gjemba, që zyrtarët thonë se ka ndihmuar shumë, por nevojitet akoma më shumë mbrojtje. Ndërtimi pritet të përfundojë në qershor të këtij viti. BE ka akuzuar bjellorusinë se po i shtyn emigrantët drejt bllokut si hakmarrje ndaj sanksioneve që i janë vendosur vendit pas zgjedhjeve të 2020-ës që u konsideruan të manipuluara dhe raprezaljes së protestave që shpërthyen më pas. Por Minsku i refuzon këto akuza. Me mijëra emigrantë, kryesisht nga lindja e mesme, janë përpjekur të kalojnë kufirin polak për të hyrë në BE gjatë vitit të shkuar.