Sekretari amerikan i Shtetit, Antony Blinken, tha të hënën në Izrael se negociatat që po zhvillohen për armëpushim në Gaza, janë “ndoshta mundësia e fundit” për të arritur një marrëveshje për t’i dhënë fund luftës. “Ky është një moment vendimtar, ndoshta më i miri, ndoshta i fundit për të kthyer pengjet në shtëpi, për të arritur armëpushim, dhe për të hyrë në rrugën e duhur për paqe të qëndrueshme dhe siguri”, tha Blinken pas takimit me presidentin izraelit, Isaac Herzog. Diplomati i lartë amerikan tha se presidenti i Shteteve të Bashkuara, Joe Biden e ka dërguar atë në Izrael “për të arritur këtë marrëveshje”. “Është koha që të përfundohet kjo punë. Po ashtu, është koha që të sigurohemi që askush të mos marrë hapa që mund të dëmtojnë procesin”, tha Blinken. “Ne jemi duke punuar që të garantohemi se nuk ka përshkallëzim, nuk ka provokime, që nuk ka veprime që mund të largojnë nga arritja e kësaj marrëveshjeje, apo që të përshkallëzohet konflikti në vendet tjera, me intensitet më të lartë”. Blinken, në vizitën e tij të nëntë në Lindjen e Mesme prej sulmit të Hamasit më 7 tetor në Izrael, pritet të takojë edhe kryeministrin e Izraelit, Benjamin Netanyahu. Sekretari amerikan i Shtetit e ka cilësuar situatën aktuale si të “tensionuar” në Izrael dhe ka paralajmëruar kundër ndonjë veprimi që mund t’i rrisë tensionet, pas kërcënimeve të Iranit dhe grupit të armatosur libanez, Hezbollah, për t’u hakmarrë ndaj vrasjeve të kryera së fundmi ndaj dy liderëve militantë.