Situata meteorologjike në vend ka shkaktuar disa probleme në disa qytete dhe akse të ndryshme. Librazhdi është përfshirë nga një stuhi e fortë shiu dhe ere, ku si pasojë shembjeve të gurëve në rrugë është bllokuar aksi nacional Elbasan- Librazhd tek kthesat e Murrashit. Ndërkohë rënia e gurëve nga shpati i malit për shkak të stuhisë ka bllokuar qarkullimin. Fatmirësisht nuk ka pasur mjete në levizje. Drejtuesit e mjeteve të bllokuar në rrugë kanë tentuar të largonin me duar një pjesë të gurëve, për të bërë të mundur kalimin, ndërsa ka patur ndërhyrje edhe nga autoritetet. Bëhet me dije se efektivët e zjarrfikëses kanë ndihmuar njerëzit që janë bllokuar nga uji në makinë. Duke marrë shkas nga kjo situatë, Bashkia e Librazhdit u bën thirrje qytetarëve të evitojnë daljet e panevojshme nga shtëpia dhe për emergjenca të telefonojnë ekipet e bashkisë dhe emergjencave.