Mjekësia, filologjiku, politekniku e fakultete të tjera marshuan rrugëve të kryeqytetit për tu mbledhur për të dytën ditë me radhë para Ministrisë së Arsimit. Protestë që dhe njëherë nisi me tensione. Përplasjet mes protestuesve dhe policisë nuk munguan. Përleshje ku për orë të tëra nuk u kursye as godina që edhe këtë të mërkurë ishte e boshatisur, pasi I gjithë stafi nuk kishte shkuar, ndërsa të vetmit brenda oborrit rrethues ishin efektivët e Forcës së Sigurisë Kombëtare dhe ata Shqiponja. Për orë të tëra studentët u përleshën me policinë. Ata shkulën gardhet metalike si dhe ndezën zjarr në koshat e mbeturinave duke krijuar barriera provizore për të frenuar uniformat blu. Por tensionet u përshkallëzuan, ku nga njëra anë ishin protestuesit që gjuanin me gurë e sende të tjera të forta e nga ana tjetër policia që kundërpërgjigje me ujë me presion e gaz. Nuk munguan as shoqërimet.