Disa politikanë mendojnë se kanë gjetur një zgjidhje ideale për ngërçin mbi kufirin e borxhit në SHBA. Bëhet fjalë për një zgjidhje në formë platini: A mund të prodhohet një monedhë 1 trilion dollarëshe? Edhe përkrahësit më të fortë të kësaj ideje, që nuk janë edhe aq të shumtë, nuk e kanë marrë aq seriozisht idenë. Ata thonë se është një mënyrë e pazakontë për të dalë nga një problem i pazakontë kontabiliteti që do të ketë pasoja të rënda për qytetarët e zakonshëm dhe ekonominë nëse nuk zgjidhet në ditët në vijim. Por megjithë shakatë se shembëlltyra e kujt do të shfaqej në monedhë, një ide e tillë është e mbështetur në disa studime. Sado që duket jorealiste, është diçka e imagjinueshme që qeveria të kthejë 1 trilion dollarë në një monedhë, pa pasur nevojë për miratimin e ligjvënësve. Si është e mundur kjo kur sekretari i thesarit nuk mundet thjesht të printojë para për të paguar borxhet publike? Është e mundur falë një ligji të çuditshëm të mbi 20 viteve më parë që duket se lejon administratën të presë monedha të çdo forme pa miratimin e Kongresit për sa kohë që ato të jenë prej platini. Qëllimi ishte që të prodhoheshin monedha përkujtimore për koleksionistët, jo që të krijohej një opsion bërthamor për zgjidhjen e një krize fiskale. Ligji thotë se sekretari i thesarit "mund të presë dhe lëshojë herë pas here monedha platini në kushte të veçanta. Por Sekretarja e Thesarit Janet Yellen, Shtëpia e Bardhë dhe disa demokratë e hodhën poshtë idenë. "Ajo që është e nevojshme është që Kongresi të tregojë se bota mund të ketë besim se Amerika do ta paguajë borxhin."