Kryeministri grek Kyriakos Mitsotakis viziton Turqinë gjatë ditës për bisedime me presidentin turk Rexhep Tajip Erdogan, me qëllim ruajtjen dhe cuarjen përpara të momentit pozitiv në marrëdhëniet dypalëshe, pavarësisht problemeve të hershme mes fqinjëve. Turqia dhe Greqia, anëtare të NATO-s dhe armiq historikë, kanë qenë prej kohësh në mosmarrëveshje për çështje të ndryshme që variojnë nga kufijtë detarë, burimet e energjisë në Mesdheun lindor, fluturimet mbi detin Egje dhe Qipron e ndarë etnikisht. Pas vitesh tensione që i sollën të dy vendet në prag konflikti, Ankaraja dhe Athina filluan të ndërmarrin hapa të profilit të lartë për të përmirësuar lidhjet e tyre në vitet e fundit, veçanërisht vitin e kaluar pasi të dy udhëheqësit u rizgjodhën. Një burim diplomatik turk tha se Erdogan dhe Mitsotakis do të diskutojnë gjatë vizitës për çështje që variojnë nga teknologjia, turizmi dhe lidhjet ekonomike deri te kundërterrorizmi dhe emigracioni, duke shtuar se do të formohet gjithashtu një "Këshill i Përbashkët Biznesi" për të bashkuar njerëzit e biznesit në të dyja vendet. Erdogan vizitoi Athinën dhjetorin e kaluar në atë që ai e përshkroi si një epokë të re në lidhjet mes dy vendeve dhe bashkë me Mitsotakis nënshkroi "Deklaratën e Athinës", që synon të shtrojë rrugën për një udhërrëfyes për zbutjen e tensioneve të hershme. Ata ranë dakord të rrisin tregtinë, të mbajnë kanalet e komunikimit të hapura, të ndërmarrin masa ushtarake të ndërtimit të besimit, të ulin tensionet dhe të punojnë për zgjidhjen e problemeve që i kanë mbajtur të ndarë në detin Egje. Të dielën, Mitsotakis i tha të përditshmes turke Milliyet se vizita e tij në Ankara, e para në pesë vjet, është një mundësi për të vlerësuar përparimin e arritur muajt e fundit dhe për të përsëritur angazhimin e Athinës për përmirësimin e lidhjeve.