Marina Mbretërore britanike ka identifikuar dhe monitoruar dy anije luftarake ruse në ujërat e Kanalit Anglez, ka konfirmuar Ministria e Mbrojtjes (MoD). Ky është incidenti më i fundit që shton shqetësimet për rritjen e tensioneve detare midis Londrës dhe Moskës. Sipas MoD, HMS Severn u aktivizua menjëherë sapo u raportua prania e një anijeje ushtarake ruse dhe një cisternë shoqëruese që po lëviznin drejt perëndimit përgjatë Kanalit Anglez gjatë dy javëve të fundit. Detyra e anijes britanike ishte të siguronte që mjetet detare ruse të kalonin pa ndërhyrje dhe të shmangeshin çdo lloj veprimi i papritur. Pasi situata u vlerësua si e qëndrueshme, monitorimi i drejtpërdrejtë iu transferua një aleati të NATO-s në atë zonë, ndërsa HMS Severn vazhdoi mbikëqyrjen nga distanca, për të garantuar sigurinë dhe për të reaguar në rast të çdo devijimi apo provokimi të mundshëm. Sekretari britanik i Mbrojtjes, John Healey, deklaroi se veprimet e fundit të Moskës në afërsi të ujërave territorialë britanikë tregojnë “një rritje të qartë të agresionit rus”, duke theksuar se ky aktivitet nuk ndikon vetëm në sigurinë e Mbretërisë së Bashkuar, por “ka pasoja për të gjithë Evropën”. Ky incident vjen vetëm një javë pasi anija ruse e spiunazhit Yantar u raportua pranë brigjeve të Skocisë, ku sipas burimeve ushtarake përdori lazer për të penguar pilotët e RAF gjatë një misioni gjurmimi. Zyrtarët britanikë e kanë cilësuar këtë sjellje si provokuese dhe potencialisht të rrezikshme, duke ngritur shqetësime për synimet e Rusisë në ujërat e Atlantikut Verior.