Sekretari i Përgjithshëm i NATO-s, Mark Rutte, e përshkoi si “shumë të suksesshëm” raundin e bisedimeve për propozimin e Uashingtonit, që u zhvillua gjatë fundjavës në Gjenevë, mes negociatorëve ukrainas dhe amerikanë. “Qartësisht, disa nga elementet duhet të shqyrtohen me maturi”, tha Rutte për planin 28-pikësh, duke shtuar se “si bazë, ai i shërbeu qëllimit të vet, duke i sjellë dy palët në një dialog të vërtetë”. Në një intervistë për Radio Evropa e Lirë nga selia e aleancës në Bruksel, Rutte konfirmoi se ka qenë në kontakt si me Trumpin ashtu edhe me presidentin ukrainas, Volodymyr Zelensky, gjatë fundjavës. “Rezultati përfundimtar i bisedimeve është një Ukrainë sovrane që ecën përpara, një komb i fortë, dhe një Rusi që kurrë të mos provojë të sulmojë më. Di një gjë për rusët në përgjithësi dhe për Putinin në veçanti: sa herë që bëhet një marrëveshje, duhet të siguroheni që është në interesin e tij që ta zbatojë. Prandaj është shumë e rëndësishme që sa herë të arrihet një marrëveshje paqeje për Ukrainën, Putin të mos provojë më kurrë. Dhe, ai nuk do të provojë më kurrë, kur ta dijë se pasojat për të, do të jenë shkatërruese nëse tenton të pushtojë përsëri Ukrainën pas një armëpushimi afatgjatë ose, më mirë, pas një marrëveshjeje paqeje”.