Presidenti i Turqisë, Rexhep Tajip Erdogan, do të flasë me homologun rus Vladimir Putin, vetëm disa ditë pasi SHBA zbuloi një plan të diskutueshëm për t'i dhënë fund luftës në Ukrainë. "Do të kem një telefonatë me Putin", tha Erdogan në një konferencë për shtyp në samitin e G20-ës në Afrikën e Jugut, pas kundërshtimit nga Kievi dhe aleatët e tij për draftin e planit që pranon disa nga kërkesat e ashpra të Rusisë. Presidenti amerikan Donald Trump, i ka dhënë Ukrainës kohë deri më 27 nëntor për të miratuar planin që duhet t’i japë fund konfliktit gati katërvjeçar. Erdogan tha se Turqia nuk do të lërë gur pa lëvizur për të provuar dhe ndërmjetësuar një fund të konfliktit. "Kaq shumë njerëz kanë vdekur; do të diskutoj me Putinin se çfarë hapash mund të ndërmarrim për të ndaluar këto vdekje. Pas këtyre diskutimeve, besoj se do të kem mundësinë të diskutoj rezultatin me partnerët tanë evropianë, presidentin Trump dhe miq të tjerë," tha ai. Më 19 nëntor, Erdogan priti udhëheqësin ukrainas Volodymyr Zelensky në Ankara për bisedime, në të cilat ai i nxiti të dyja palët të ktheheshin në tryezën e negociatave në Stamboll, ku kishin zhvilluar tre raunde negociatash më herët këtë vit. Zelenski kishte thënë se po shkonte në Ankara për të provuar të ringjallte përfshirjen e SHBA-së në përpjekjet diplomatike për t'i dhënë fund pushtimit rus. Por i dërguari i Trump, Steve Ëitkoff, nuk mori pjesë në bisedimet në Turqi dhe Zelenski u largua nga takimi me pak për të treguar. Vetëm disa ditë më vonë, dolën detaje të planit 28-pikësh të Trumpit për t'i dhënë fund konfliktit, i cili i zuri Kievin dhe aleatët e tij evropianë në befasi, pasi në fakt do ta detyronte Ukrainën të hiqte dorë nga toka të saj, të shkurtonte ushtrinë dhe të zotohej të mos i bashkohej kurrë NATO-s. Bisedimet e Stambollit, të cilat u zhvilluan midis majit dhe korrikut, nuk arritën të jepnin asgjë më shumë sesa shkëmbime të të burgosurve të luftës.