Rrugët e Tiranës dhe jo vetëm janë mbushur me sirianë që kanë kaluar kufirin e gjelbër dhe që synim kryesor kanë një nga vendet e Bashkimit Evropian. Shumë persona janë implikuar tashmë në veprën penale të dhënies së ndihmës për kalim të paligjshëm të kufirit e sigurisht që edhe shumë janë arrestuar nga Policia. Sirianët bien preh e trafikantëve shqiptarë. Paguajnë shumë lekë për një kalim transit në Kosovë, Malin e zi, apo Itali me destinacion një prej vendeve të Bashkimit Europian për t’u bashkuar me të afërm të larguar ndoshta që prej nisjes së luftës në Siri. Por, dikur ishin shqiptarët që kërkonin rrugë për t’u larguar në Evropë, apo edhe më përtej në Shtetet e Bashkuara të Amerikës dhe Kanada. Për shkak të faktorëve të ndryshëm si largësia midis vendit të origjinës dhe destinacionit, mjetet e përdorura të transportit, periudha e vitit, moti, prania e kontrolleve të shtuara policore dhe kufitare, e të tjerë, nuk mund të ketë tarifa standarde për trafikun e emigrantëve. Kështu, në vitin 2006, ndihma për kalimin e paligjshëm të kufirit grek kushtonte nga 150 deri në 600 dollarë. Ndërsa transportimi deri në brendësi të shtetit helen shkonte nga 500 deri në 1000 dollarë.