Presidenti Ilir Meta ka administruar propozimet e Këshillit të Lartë Gjyqësor, për emërimin e katër anëtarëve të rinj në Gjykatën së Lartë, të cilët janë përzgjedhur për t`u emëruar në këtë Gjykatë përmes procedurave të ngritjes në detyrë nga radhët e gjyqësorit. Meta, pasi shqyrtoi vendimmarrjen e Këshillit të Lartë Gjyqësor dhe propozimet e përcjella nga ky organ, së bashku me praktikën dokumentare të ngritjes në detyrë për në Gjykatën e Lartë, nga radhët e gjyqtarëve, për katër pozicionet e lira në fushën e të drejtës penale, pranoi propozimet e KLGJ-së, duke vendosur emërimin e Sokol Binajt, Albana Boksit, Sandër Simonit dhe Klodian Kurushit. Me këto 4 emërime të reja, Gjykata e Lartë bëhet tani me 7 anëtarë, nga 19 që duhet të ketë, sipas vendimmarrjes së KLGJ-së. Ka kaluar një vit që nga propozimi i kësaj të fundit për emërimin e 3 anëtarëve të parë në Gjykatën e Lartë. Nëse KLGJ do të ndjekë këtë ritëm, atëherë Gjykata e Lartë, do të plotësohet me të gjithë trupën gjyqësore, në mars të vitit 2024, thotë presidenti, i cili e konsideron të papranueshme një gjende të tillë.