Viktimat civile po shtohen ndërsa Rusia vazhdon ofensivën e saj në Ukrainën lindore, duke pretenduar se ka kapur edhe dy fshatra të tjera, ndërkohë që presidenti ukrainas, Volodymyr Zelensky, premtoi të hakmerret me më shumë sulme brenda territorit rus. Ukraina nuk ka bërë ende komente për pretendimet e Ministrisë ruse të Mbrojtjes se forcat e saj kishin kapur të shtunën fshatin Zeleniy Hai në rajonin e Donjeckut dhe fshatin Malivka në rajonin e Dnipro-petrovskut. Zelensky pranoi se kishte luftime të ashpra përgjatë vijave të frontit në rajonet lindore të Ukrainës, por foli gjithashtu për “veprime të suksesshme të njësive ukrainase” në rajonin e trazuar të Sumyt dhe tha se forcat e tij po “eliminojnë pushtuesit në zonat kufitare”. Zelensky gjithashtu tha se pika kryesore e sulmeve ruse mbetej afër qendrës së rëndësishme logjistike të Pokrovskut, një qytet me një popullsi që para luftës ishte më shumë se 60.000 banorë, por që tani është kthyer në një grumbull rrënojash për shkak të sulmeve ajrore ruse. Në fjalimin e tij të përnatshëm, Zelensky tha se komandanti ushtarak ukrainas, Oleksandr Sirski, e kishte identifikuar Pokrovskun si një zonë që kërkon “vëmendje të veçantë” për shkak të sulmeve të vazhdueshme ruse. Zelensky ndërkohë premtoi të hakmerret me sulme të mëtejshme mbi objektiva ushtarake brenda Rusisë pasi numri i viktimave civile u rrit të shtunën në disa rajone të vendit, të goditura nga artileria dhe dronët rusë. “Sot, për fat të keq, pati shumë sulme ruse në qytetet dhe komunitetet tona: në Sumy si dhe në Dnipro, Harkiv, rajonin e Hersonit dhe rajonin e Donjeckut”, tha Zelenski. “Sulme të tilla, padyshim, nuk mund të mbeten pa përgjigje, dhe dronët ukrainas me rreze të gjatë veprimi do ta garantojnë këtë”, tha ai. Pas deklaratave të fundit të Zelenskit, autoritetet ruse raportuan sulme brenda territorit rus. Guvernatori i rajonit rus të Kurskut, tha të shtunën se një dron ukrainas kishte vrarë një person në fshatin Obesta, rreth 5 kilometra nga kufiri. Ndërsa autoritetet në rajonin e Volgogradit thanë se mbetjet e rëna nga dronët ukrainas të shkatërruar kishin dëmtuar furnizimin me energji elektrike në një hekurudhë pranë zonës kufitare. Zyrtarët thanë se edhe trafiku në aeroportin e qytetit ishte ndërprerë.