Pavarësisht se vaksinimi është arma më e fuqishme për parandalimin e infektimit me koronavirus, ka ende një shans që dikush, që është vaksinuar, të preket nga covidi, të jetë asimptomatik dhe t’ia kalojë atë të tjerëve. Kjo, pasi vaksina e koronavirusit, që përvec asaj të Johnson and Johnson jepet me dy doza, ofron shkallë të ndryshme mbrojtjeje, në marrjen e dozës së parë dhe asaj të dytë, por edhe kërkon një kohë të caktuar pas administrimit që të krijojë mbrojtjen imunitare të kërkuar. Ndaj edhe rastet kur një person i vaksinuar, ka rezultuar pozitiv për koronavirus, janë raportuar. Mes tyre edhe ai i doktorit të njohur në shqipëri, Pëllumb Pipero i cili u infektua pasi u bë një ndër të parët mjekë që u vaksinuan në shqipëri. Ekspertët thonë se gjatë periudhës që një person është në fazë vaksinimi, duhet të vijojë të mbajë maskë. Raporti prej rreth 4-5 për qind i joefikasitetit që mund të kenë vaksinat e bën të nevojshme edhe që të vaksinuarit të vijojnë të respektojnë masat si distancimi fizik apo mbajtja e maskave. Vaksina anti covid, rrjedhimisht, nuk na bën të paprekshëm nga infeksioni, por ul ndjeshëm agresivitetin e sëmundjes, në rastet kur prekemi dhe personat e vaksinuar mund ta kalojnë më lehtë, duke ulur rastet që kërkojnë shtrim në spital. Ndonëse rreziku i infektimit është më i madh kur vaksinimi nuk është i plotë, ndodh edhe që persona që i kanë marrë të dyja dozat e vaksinës, mund të riinfektohen me koronavirus, por një rast i tillë do të konsiderohej jo i zakonshëm. Por kur flasim për sars cov-2, mënyra se si u shfaq dhe u përhap, dhe batërrdia që la pas, bën që ekspertët të mos mund të flasin me siguri, për shumëcka. Ka paqartësi për riinfektimin dhe imunitetin afatgjatë. Nuk dihet se sa i zakonshëm është riinfektimi, por, raportet kanë treguar se ai ndodh.