Gjatë kontrolleve intensive në rrugët interurbane Kavajë-Rrogozhinë e Kavajë –Durrës, gjatë muajit korrik dhe gusht, policia rrugore ka konstatuar disa drejtues mjetesh të cilët kanë ecur me shpejtësi deri në 167 km në orë. Si rezultat I kontrolleve të shtuara, vetëm javëne fundit janë pezulluar 25 leje drejtimi për arsye të ndryshme të cilat përbëjnë rrezik në rrugë. Sipas policisë, këta drejtues mjetesh kanë qarkulluar me shpejtësi mbi normat e lejuara, duke variuar nga 129 deri në 152 km në orë dhe kanë kryer parakalime të gabuara, gjë e cila shkakton rrezik potencial për shkaktimin e aksidenteve rrugore. Përvec kësaj, janë vendosur 102 masa administrative për shpejtësi dhe manovra në rrugë, si dhe janë vendosur 8 masa administrative maksimale me vlerë 40.000 lekë të rinj pasi drejtuesit e mjeteve ishin shtetas të huaj. Policia rrugore bën apel për të gjithë drejtuesit e mjeteve të respektojnë kodin rrugorë, pasi në të gjitha akset nacionale nga Rruga e Kombit deri në Sarandë e nga Korça në Berat si dhe në qendrat kryesore urbane ka patrulla të Policisë Rrugore me radarë, alkooltestues, dronë, kamera e aparatë fotografik.