Brazilianët në të gjithë vendin kanë dalë me kazanë e tenxhere nëpër dritare, duke u rënë atyre fort, në kohën kur presidenti Jair Bolsonaro, i drejtohej kombit me një fjalim në të cilin mbronte qëndrimin e tij ndaj pandemisë, e ku pretendonte se qytetarët shumë shpejt do të mund ti riktheheshin jetëve normale të tyre. Dhe e gjithë kjo, vetëm pak orë pasi vendi raportoi një rekord prej 3251 viktimash nga koronavirusi. Kjo ishte hera e parë në të cilën bilanci ditor i viktimave e kapërcente shifrën 3 mijë në brazil, vend ky nga më të goditurit në botë dhe që po sheh tani një rritje infektimesh që i ka cuar spitalet drejt kolapsit. Në total, brazili ka regjistruar rreth 299 mijë viktima, shifra e dytë më e lartë në botë pas Shteteve të Bashkuara. Dhe rekordi i zi erdhi në të njjëtën ditë kur presidenti Jair Bolsonaro, emëroi ministrin e tij të katërt të shëndetësisë në vetëm një vit pandemi, i përballur me presionin për të ndryshuar taktikë pas minimizimit të virusit dhe anashkalimit të këshillave të ekspertëve për vënien e tij nën kontroll.