26 persona kanë rënë në prangat e Policisë së Tiranës, pasi shkelën rregullat e qarkullimit rrugor, bëjnë të ditur uniformat blu, të cilët kanë publikuar një bilanc të shkeljeve në rrugët e kryeqytetit në harkun kohor të një jave. Përvec shoferëve të ndaluar, janë pezulluar edhe 110 leje drejtimi, për drejtuesit e automjeteve që kanë qenë në gjendje të dehur, apo që kanë kaluar normat e shpejtësisë së lejuar. Nuk kanë mbetur pa u ndëshkuar edhe drejtuesit e motomjeteve të cilët nuk kanë vendosur kaskën mbrojtëse , duke thyer rregulloren. Rreth 225 masa administrative janë marrë kundrejt tyre. Sipas uniformave blu 2100 drejtues mjetesh janë ndëshkuar për manovra të rrezikshme në rrugë si përdorimi i celularit në timon, mosmbajtja e rripit të sigurimit, parakalime të gabuara dhe shkelje të ndryshme. Policia e Tiranës bën të ditur se do të vijojë kontrollet me qëllim rritjen e parametrave në rrugë dhe ndëshkimin e drejtuesve të mjeteve që nuk respektojnë kodin rrugor dhe rrezikojnë jetën e qytetarëve.