Policia e Durrësit ka arrestuar në flagrancë 2 të rinj dhe ka shpallur në kërkim një tjetër, pasi I ka kapur me rreth 8 kg lëndë narkotike e dyshuar cannabis sativa. Sipas njoftimit të policisë bazuar në informacionet e disponuara nga Seksioni për Hetimin e Narkotikëve në Durrës, u organizua puna dhe finalizua me sukses operacioni i koduar "Tranzit". Gjatë këtij operacioni u arrestuan një 25 vjeçar, banues në fshatin Larushkë, Krujë dhe një 31 vjeçar, banues në fshatin Gramëz, Fushë Krujë, i dënuar më parë për veprën penale "Kultivimi i bimëve narkotike". Arrestimi i tyre u bë pasi, në Fushë Krujë, gjatë kontrollit në mjetin tip "Audi" në pronësi të 25 vjeçarit, ku ndodheshin edhe dy persona të tjerë u gjet një sasi prej 8 kg e 200 gr. Policia sqaron se droga ishte në zotërim të 31 vjeçarit dhe do të blihej nga 25 vjeçari.