Administrata e presidentit amerikan, Joe Biden, ka nisur një rishikim zyrtar mbi të ardhmen e burgut ushtarak në Guantanamo Bay në Kubë, duke rikthyer kështu përpjekjet për mbylljen e burgut kontrovers. Mësohet se ndihmësit e kreut të shtetit të përfshirë në këtë iniciativë po shohin mundësinë e një urdhri ekzekutiv të firmosur nga Biden në javët ose muajt e ardhshëm. Lajmin e pohuan për reuters dy zyrtarë të afërt me cështjen. Ata treguan kështu qartë se do të ketë një tentativë të re për mbylljen e objektit, që mbrojtësit e të drejtave të njeriut, e konsiderojnë një njollë në imazhin global të SHBA-së. “Jemi duke nisur një proces në Këshillin për Siguri Kombëtare për të analizuar trashëgiminë e lënë nga administratat e kaluara, dhe në linjë me administratën Biden për të mbyllur Guantanamon”, tha zëdhënësja e këtij këshilli, Emily Horne. Kjo megjithatë nuk pritet të ndodhë shumë shpejt. Burgu I Guantanamos u krijua për të strehuar të dyshuarit e jashtëm pas sulmeve të 11 shtatorit të vitit 2001 në Nju Jork dhe Uashington. Por ai u kthye në simbol të praktikave të ashpra të trajtimit të të burgosurve në kuadër të luftës së SHBA-së ndaj terrorizimit.një formë mbylljeje të këtij burgu e kishte vendosur ish-presidenti amerikan, Barack Obama, por kjo politikë e tij u kthye mbrapsht nga paraardhësi i Bidenit, Donald Trump.