Policia maqedonase vuri në pranga 21 persona të dyshuar për trafikim me lëndë narkotike, pa i lënë mundësi shpëtimit. Gjatë aksionit të njësive special, të kryer njëkohësisht në disa zona të Shkupit, u konfiskua një sasi e konsiderueshme e drogës, pajisje komunikimi, para të thata, makina dhe armë. Prokuroria për Krim të Organizuar dhe Korrupsion, nuk e bëri të ditur sasinë e lëndës narkotike, por prokurorja Vilma Ruskovska tha se trafikantët kishin qenë prej më shumë se një viti nën vëzhgimin e policisë. “Gjatë një viti kemi mbledhur dëshmi të shumta. Janë zbatuar masa të posaçme hetimore, si përgjim i komunikimeve në telefon. Për momentin kemi 21 persona të arrestuar që gjenden në disa stacione policie. Në kërkim janë edhe persona të tjerë kështu që do të kemi numër të madh të të arrestuarve”, deklaroi prokurorja. Ajo nuk e përjashtoi mundësinë që pjesë e grupit të jetë edhe ndonjë zyrtar policor, por për momentin nuk ka të kapur asnjë prej tyre, edhe pse dyshimet ekzistojnë mbi lidhje të mundshme mes disa efektiveve me trafikantët e drogës.