Turqia deklaroi se ka ritmet më të ulëta të vdekshmërisë nga COVID-19 në Evropë. Sipas statistikave, ajo rezulton më mirë se shumë vende të pasura europiane. Por sipas Zërit të Amerikës, mjekët paralajmërojnë se vetëkënaqësia është e rrezikshme. Kreu i Spitalit Sultangazi Haseki të Stambollit, Dr. Sonmez, thotë se strategjia e reagimit agresive ndaj sëmundjes ishte çelësi i suksesit të Turqisë. “Në trajtimin e pacientit ka shumë rëndësi që sëmundja të menaxhohet para se i sëmuri të kenë nevojë për kujdes intensiv. Kjo arrihet me masa të hershme dhe cilësore. Nëse pacienti ka nevojë për kujdes intensiv, rriten ritmet e vdekshmërisë”, shprehet ai. Me rënien e numrit të të shtruarve me COVID, personeli mjekësor shprehet disi i çliruar. “ Tani jemi në gjendje shumë më të mirë pasi kanë rënë rastet. Kjo na ka rritur motivimin”, shprehen ata. Në Stamboll ka pasur zgjerim edhe të shërbimeve private spitalore, prandaj kur epidemia goditi këtë qytet, sistemi nuk u stresua.Po ashtu mjekëve iu dha liria e veprimit në reagimin me pacientët. Ekspertët përmendin edhe faktin që Turqia ka një popullatë mesatarisht të re, si faktor për ritmet e ulëta të vdekshmërisë, pasi të rinjtë janë në përgjithësi më rezistentë ndaj kësaj sëmundjeje. Megjithatë, tani që qeveria ka lehtësuar masat e izolimit fizik dhe po shtohen testimet, ritmet e përhapjes së infeksionit rezultojnë dy herë më të larta. Dr Sonmez thotë se “deri kur të zhvillohet vaksina, virusi do të jetë një sfidë e pranishme në jetët tona”.