Një 23-vjeçare gjermano-irakiane akuzohet për vrasje, pasi dyshohet se kërkoi në Instagram një vajzë të ngjashme me veten dhe e vrau atë, në përpjekje për të falsifikuar vdekjen e saj. Bëhet fjalë për gruan e identifikuar si Shahraban. Ajo dyshohej të ishte viktima që u gjet gushtin e kaluar në një “Mercedes” të parkuar në jug të Gjermanisë. Disa anëtarë të familjes së saj kishin identifikuar trupin e saj, por një raport i autopsisë të nesërmen ngriti pikëpyetje mbi identitetin e saj për shkak të disa tatuazheve. Viktima më pas rezultoi të ishte Khadidja O, një blogere 23-vjeçare me origjinë algjeriane. Dy vajzat dukeshin jashtëzakonisht të ngjashme. Prokurorët thanë se Shahraban u akuzua gjithashtu se i kishte ofruar një burri, të identifikuar si A, 10 mijë euro për të vrarë vëllain e burrit të saj. Një 24-vjeçar kosovar, i quajtur Sheqir K, akuzohet gjithashtu se ka vepruar si bashkëpunëtor i Shahraban. Shahraban Kh-B dhe Sheqir K të dy do të dalin në gjyq për vrasje. Viktima kishte pranuar një kërkesë nga Shahraban K, e cila i kishte shkruar në Instagram duke i ofruar trajtim falas në një studio kozmetike. Shahraban K dhe Sheqiri e morën atë nga nga shtëpia me një veturë dhe gjatë udhëtimit u ndalën në mal. E nxorën nga vetura Khadidjan dhe e goditën prapa kokës duke e rrëzuar në tokë, “para se ta vrisnin me 56 goditje me thikë”. Prokuroria ka deklaruar se trupi i viktimës është shpërfytyruar tërësisht. Më shumë se 190 dëshmitarë janë në dispozicion për t'u thirrur për të dëshmuar për këtë rast, teksa dyshja rrezikon dënim të përjetshëm.