Fundjava ka rezultuar e ashpër me disa drejtues automjetesh të cilët kanë shkelur rregullat e qarkullimit rrugor. Si pasojë e masave të shtuara të kontrolleve gjatë 24 orëve të fundit, janë konstatuar shumë drejtues mjetesh, që kanë tejkaluar shpejtësinë më shumë se limiti i lejuar nga 134 km/h në rrugën interurbane Tiranë – Elbasan, deri në 161 km/h në aksin Rrogozhinë - Kavajë si dhe drejtues që kanë drejtuar mjetet nën efektin e alkoolit apo në gjendje të dehur. Për pasojë policia ka arrestuar në flagrancë 7 drejtues mjetesh dhe motomjetesh, nga të cilët, 5 për drejtim mjeti pa leje drejtimi dhe 2 për drejtim mjeti në gjendje të dehur. Pashtu janë pezulluar 39 leje drejtimi, nga të cilat 26 për shpejtësi mbi normat e lejuara dhe 13 për drejtim mjeti nën efektin e alkoolit apo në gjendje të dehur. Sipas policisë si rezultat i kontrolleve dhe denoncimeve nga qytetarët janë ndëshkuara me gjobë në të gjithë vendin, 1046 drejtues mjetesh, për shkelje që sjellin pasoja në jetën dhe shëndetin e përdoruesve të rrugës, kryesisht për parakalime të gabuara, për përdorim të celularit gjatë drejtimit të automjetit, për mos vendosje të rripit të sigurimit apo kaskës mbrojtëse etj. Policia paralajmëron drejtuesit se në të gjitha rrugët e vendit ka radarë dhe prezencë të Policisë Rrugore, të pajisur edhe me dronë, dragera, kamera e aparatë fotografik për regjistruar çdo shkelje.