Policia e Elbasanit ka vënë në pranga drejtuesin e autobusit, Driton Pashai, i cili në drejtim të autobuzit me 15 pasagjerë kryente manovra të rrezikshme duke shkaktuar një aksident fatal, mbrëmjen e 4 qershorit. Ngjarja ka ndodhur në afërsi të fshatit Tregan në Elbasan. Megjithëse ishte errësirë, shoferi i autobuzit ka kryer manovra të rrezikshme në aksin rrugor. Në dëshminë e tij për efektivët e policisë, Pashai ka deklaruar se autobuzi ka marrë superxhiro, prandaj e ka pasur të pamundur të frenojë. Për rreth 1 kilometër autobuzi ka ecur me shpejtësi ekstreme deri në momentin kur është përplasur. Në gjendje ankthi dhe paniku, një 47 vjeçare Mimoza Kasa u hodh nga dera e autobuzit, e cila ka qenë e hapur. Menjëherë, Kasa është dërguar në spital, por pavarësisht përpjekjeve të mjekëve, nuk ka mundur t’ju mbijetojë plagëve të marra, duke ndërruar jetën vetëm disa orë pas aksidentit. Mësohet se viktima ka qenë punonjëse në Llixha si dhe ka qenë duke u kthyer nga puna, mbrëmjen e 4 qershorit. Ndërkohë, drejtuesi Dritan Pasha është arrestuar nga autoritetet policore për kryerjen e manovrave të rrezikshme në rrugë.