Vijon të jetë problematike situata me zjarret, ku vatra në malin e Dukatit vijon të jetë shqetësuese, çka ka bërë që vendit tonë t’i vijë në ndihmë edhe Italia, me avionë Canadair, në kuadër edhe të Mekanizmit Europian te Mbrojtjes Civile. Teksa luftohet me të gjitha mjetet për izolimin e flakëve dhe shuarjen e tyre, nga ana tjetër të paktën 3 prej efektivëve të forcave zjarrfikëse kanë shfaqur probleme me asfiksinë, çka ka bërë dërgimin e tyre në spitalin e Vlorës. Efektivët Luan Kapaj, Andrea Lala dhe Defrim Bilali kanë marrë ndihmën mjekësore në spitalin e Vlorës, teksa gjendja e tyre shfaqet tashmë e stabilizuar. Ata u vizituan në spital nga ministri i Mbrojtje Pirro Vengu, i cili theksoi në një deklaratë për mediet se gjendja e tyre është e stabilizuar, por theksoi se situata në malin e Dukatit shfaqet problematike. Sipas ministrit problem më vete mbeten temperaturat e larta, terreni i vështirë por edhe era. Vengu theksoi se pçritet ndihmë edhe nga vendet partnere për të mos lejuar që flakët të prekin Parkun Kombëtar të Llogarasë.