Në një pasdite me diell në fshatin bregdetar Simon's Toën në Cape Toën, tre majmunë, babuinë chakma, shkaktojnë trazira, duke u ngjitur në çati, duke kërcyer mes ndërtesave dhe duke u lëkundur në ulluqe. Turistët e magjepsur ndalojnë për të fotografuar majmunët. Vendasit janë më pak të impresionuar: është një skenë e përditshme në fshatin e vendosur mes Oqeanit Atlantik dhe Parkut Kombëtar Table Mountain. Rreth 500 babuinë chakma, ndër speciet më të mëdha të majmunëve, që peshojnë deri në 40 kilogramë, bredhin nëpër gadishullin në jug të Cape Toënit, thotë Instituti Kombëtar i Biodiversitetit të Afrikës së Jugut. Dhe ndërsa zhvillimi njerëzor i shtyn ata drejt malit, larg nga habitati i tyre natyror, kafshët po hyjnë gjithnjë e më thellë në pronat e njerëzve, për të kërkuar fruta e perime në kopshte. Disa madje arrijnë të futen fshehurazi në shtëpi ku mund të bëjnë kërdinë. "Ata janë bërë kaq të guximshëm tani. Janë më të zbutur sesa duhet," thotë Duncan Loë, 60 vjeç, i cili drejton një dyqan akulloresh. Ata madje kanë filluar të bastisin edhe kuzhinat dhe të rrëmbejnë ushqimin nga pjatat në restorante. Në vitin 2021, qyteti asgjësoi një majmun famëkeq alfa-mashkull, i cili kishte terrorizuar banorët me më shumë se 40 bastisje për ushqim në kazanët e plehrave, në oborret dhe verandat e tyre, e ndonjëherë duke hyrë në shtëpi ndërsa njerëzit ishin brenda. Tani, tensioni mes njerëzve dhe babuinëve është "më i larti i parë ndonjëherë", thotë ekologu Justin O'Rian, i cili drejton Institutin për Komunitetet dhe Kafshët e Egra në Afrikë në Universitetin e Cape Toënit. Një babuin pranë një zone të egër dhe urbane është "kafsha më e vështirë në botë për t'u menaxhuar", shton ai. Ndërsa vendbanimet njerëzore zgjerohen pa pushim, babuinët po shtyhen drejt malit, ku kërkimi i ushqimit është më i vështirë. Ndaj ata kthejnë sytë nga kopshtet e njerëzve, me pemë frutore dhe pishina. Por, edhe sa do të mund të durojnë banorët...?