Patrullat e policisë rrugore në të gjithë vendin përgjatë 10 ditëve të para të muajit mars kanë ushtruar kontrolle të shumta në akset kombëtare të vendit duke përdorur mjetet e pauniformuara, kamera të vendosura në automjete, radarë, alkooltestues dhe dronë, në akset rrugore kombëtare dhe rrugë të tjera të evidentuara si njolla të zeza për shkak të ngjarjeve rrugore me pasoja fatale të ndodhura më parë. Përmes këtij operacioni të gjerë të koduar “ROADPOL MARS 2021” që synonte rritjen e parametrave të sigurisë rrugore janë konstatuar dhe janë arrestuar në kushtet e flagrances53 drejtues mjetesh, nga të cilët 35 për drejtim mjeti në gjendje të dehur dhe 18 për drejtim mjeti pa leje. Po ashtu janë pezulluar 209 leje drejtimi, nga të cilat 144 për shpejtësi mbi normat e lejuara dhe 65 për drejtim mjeti nën efektin e alkoolit. Policia rrugore bën të ditur se vetëm përgjatë 10 ditëve janë vendosur 13106 masa administrative, ku 2519 prej tyre për parakalime të gabuara, 2050 për përdorim të celularit gjatë drejtimit të automjetit, 68 masa për shpejtësi mbi normat e lejuara, 537 masa për mospërdorimin e rripit të sigurimit, 244 masa për mosvendosjen e kaskës mbrojtëse, 3462 masa për parkim dhe qëndrim të gabuar si dhe 3826 masa për shkelje të tjera të Kodit Rrugor. Ky plan operacional i policisë mësohet se do të vijojë përgjatë gjithë muajit mars, me qëllim parandalimin e aksidenteve rrugore dhe rritjen e sigurisë në të gjitha rrugët, sidomos në ato me risk të lartë dhe të evidenuara si njolla të zeza.