Rebelët e mbështetur nga rusia dhe forcat ukrainase kanë shkëmbyer akuza të enjten duke akuzuar njëra tjetrën për bombardime përtej linjave të frontit në Ukrainën lindore, duke rritur kështu alarmin në një kohë kur vendet perëndimore kanë paralajmëruar për mundësinë e një pushtimi rus në cdo kohë. Detajet e incidenteve nuk mund të konfirmohen në mënyrë të pavarur dhe raportet paraprake sugjerojnë se bëhet fjalë për shkelje të armëpushimit që janë parë edhe më herët gjatë konfliktit tetë vjecar. Por ato vijnë në një kohë kur shqetësimet globale janë në qiell për perspektivën e një lufte më të gjerë, me më shumë se 100 mijë trupa ruse të mbledhura pranë kufijve të Ukrainës. Moska mohon se po planifikon një pushtim dhe tha se ka nisur tërheqjen e disa trupave edhe pse vendet perëndimore thonë se nuk janë të bindura për këtë.