Kamboxhia dhe Tajlanda thanë se kishin kryer sulme me artileri në zonat kufitare të kontestuara, herët të dielën, disa orë pasi Presidenti i SHBA-së Donald Trump tha se udhëheqësit e të dy vendeve kishin rënë dakord për një armëpushim. Kamboxhia tha se e mbështeste plotësisht thirrjen e Trumpit për një armëpushim të menjëhershëm ndërsa tajlanda, në anën tjetër, theksoi se ishte mirënjohëse ndaj Presidentit amerikan por nuk mund të fillonte bisedimet me Kamboxhian për sa kohë që ajo merrte në shënjestër civilët e saj, një pretendim që Pnom Peni e ka mohuar. "Kushti ynë është që ne të mos jemi një vend i tretë, por sidoqoftë jemi mirënjohës për shqetësimin e Trump", u tha gazetarëve kryeministri në detyrë i Tajlandës, para se të nisej për të vizituar zonat kufitare. "Kam propozuar një takim dypalësh midis ministrave tanë të jashtëm për të arritur kushtet për një armëpushim dhe tërheqjen e trupave dhe armëve me rreze të gjatë veprimi", shtoi ai. Kamboxhia tha se Tajlanda kishte filluar sulmet të dielën në mëngjes dhe se forcat tajlandeze po mobilizoheshin përgjatë kufirit. Tajlanda tha në anën tjetër se i ishte përgjigjur sulmeve nga Kamboxhia. Katër ditë pasi shpërthyen luftimet e para në më shumë se një dekadë midis fqinjëve të Azisë Juglindore, numri i viktimave ka shkuar në mbi 30, përfshirë 13 civilë në Tajlandë dhe tetë në Kamboxhia. Më shumë se 200,000 njerëz janë evakuuar ndërkohë nga zonat kufitare.