Kandidati për deputet i LSI, Endrit Braimllari është gjobitur nga Policia me shumën 5.000.000 lekë për shkak se ka organizuar takim elektoral në kundërshtim me aktin normativ për parandalimin e përhapjes së koronavirusit. PO ashtu me masë administrative 1.000.000 lekë është ndëshkuar edhe administratorja e lokalit e cila lejoi zhvillimin e këtij aktiviteti. Policia në Maliq bën të ditur se pas konstatimit në rrjetet sociale se përfaqësuesi i një subjekti politik kishte organizuar një takim me qytetarë në një lokal të qytetit, duke krijuar grumbullime në kundërshtim me Aktin Normativ. Si pasojë u morën masat përkatëse. Drejtoria Vendore e Policisë Korçë apelon për të gjithë qytetarët, pronarët dhe administratorët e lokaleve, që të respektojnë me korrektësi masat anticovid për të bërë të mundur shkëputjen e zinxhirit të infektimit nga virusi dhe fton qytetarët të denoncojnë në Komisariatin Dixhital cilindo që nuk respekton këto masa kufizuese duke u kthyer në burim rreziku për qytetarët.