Kina dhe Shtetet e Bashkuara kanë rënë dakord të ulin tarifat e vendosura mbi mallra me vlerë 60 miliardë dollarë që importohen nga njëra-tjetra; bëhet fjalë për një gamë të gjerë produktesh, që nga misri amerikan e kozmetika, e deri te pajisjet shtëpiake dhe lodrat kineze. Në kuadër të marrëveshjes tregtare SHBA-Kinë, të dyja vendet kanë propozuar trajtim tarifor më të favorshëm për mallra "jo të ndjeshme" me vlerë 30 miliardë dollarë secila, deklaroi të dielën Përfaqësuesi Tregtar i SHBA-së, Jamieson Greer. Për Shtetet e Bashkuara, kjo nënkupton "hapjen e rrugës për akses më të mirë në treg" për rreth 30% të eksporteve amerikane drejt Kinës, tha ai. Ulja reciproke e tarifave, si dhe zgjatja e armëpushimit tregtar, ishin ndër rezultatet kryesore të samitit të dytë të këtij viti midis Presidentit Xi Jinping dhe Presidentit amerikan Donald Trump, të mbajtur në Uashington javën e kaluar. Njëra nga dy listat e publikuara nga Shtëpia e Bardhë tregonte se Kina planifikonte të ulte tarifat për një sërë produktesh bujqësore amerikane, përfshirë misrin, grurin, mishin, produktet e qumështit, si dhe vajrat etj. Në listë nuk përfshihej soja. Pekini gjithashtu synon të ulë tarifat për peshkun dhe prodhimet e detit, Drurin dhe produktet e tij, kozmetikën dhe pajisjet mjekësore nga SHBA-ja. Në një listë tjetër përfshiheshin uljet reciproke të tarifave nga ana e Uashingtonit për pajisje të vogla shtëpiake kineze, si makineritë e kafesë dhe tosterat, enët e tryezës, batanijet dhe mbulesat e shtratit. Listat përfshinin gjithashtu lodra, fishekzjarre, lule artificiale, drita për pemënt e Krishtlindjes dhe dekorime të tjera festive, si dhe sedilje makinash për fëmijë.