Pas publikimit të emrave që do të jenë pjesë e kabinetit të ri qeverisës, nga vetë kryeministri Edi Rama, nuk kanë vonuar edhe shfaqjet e pakënaqësive, kryesisht dhe logjikisht, nga ata që janë ndjerë të përjashtuar. I tillë është rasti i zv kryeministrit, Erion Brace, i cili ka postuar në faqen e tij në Facebook, foton e një loje të hershme, mjaft popullore, që njihet nga shumëkush si Kala Dibrance. Në këtë lojë, të rinjtë, hidhen mbi shpinën e njëri tjetrit. Dhe kjo për Zv kryeministrin Brace, nuk është thjeshtë një lojë. Ka rezultuar të jetë edhe një stil jete. “E mbani mend? E dinit lojë apo jo? Ja që i reziston çdo kohe si stil jete!”, shkruan Braçe në Facebook nën foton në bardh e zi. E ndërsa nuk mësohet në postim se kujt i drejtohet ky mesazh, shumë përdorues të Facebook, një ide të tyren e kanë dhe e kanë treguar përmes komenteve nën foto. “Të paska goditur rëndë kryeministri Z. Braçe!?”, shkruan një qytetar. “Ata të gjatët kapërcenin më shumë”, shkruan një tjetër me ironi. Zv.kryeministri Erion Braçe nuk do të jetë pjesë e qeverisë “Rama 3”, pasi në vend të tij, kryeministri ka preferuar të zgjedhë Arben Ahmetajn. E me sa duket edhe nga ky postim i koduar, Brace nuk e ka pritur mirë largimin, që në fakt ai e njoftoi vetë më herët si dorëheqje