Që prej liberalizimit të vizave, në prill të vitit të kaluar, organizatat joqeveritare në Kosovë e panë me shqetësim se “ikja e trurit” mund të përkeqësohej. Instituti për Studime të Avancuara, raporton se gati 30 për qind e qytetarëve të Kosovës planifikonin të emigronin nga vendi pas liberalizimit të vizave. Vetëm në shtatë muajt e parë të këtij viti janë bërë gjithsej 3.950 kërkesa për azil nga shtetas të Kosovës në vendet e Evropës, shkruan Radio Evropa e Lirë, shifër kjo dukshëm me e lartë se mesatarja në gjashtë vitetet e kaluara. Numri më i lartë i kërkesave për azil u regjistrua në muajin maj, gjithsej 765 kërkesa, pjesa më e madhe e tyre drejt Francës. Franca ka qenë destinacioni kryesor i shtetasve të Kosovës që kërkojnë azil në BE prej nga viti 2018, kur për herë të parë zuri vendin e Gjermanisë si destinacion kryesor. Gjermania gjatë viteve të fundit, synohej nga shtetasit e Kosovës, për shkak të procedurave të lehtësuara për punësim. Sakaq, Numri i udhëtarëve përmes transportit ajror në Kosovë është rritur në krahasim me vitin e kaluar.