Gazetari amerikan Guy Lawson, autor i librit “Armët dhe çunat”, i cili fitoi gjyqin pas padisë së Shkëlzen Berishës thotë se ka një mënyrë për të rihapur hetimin për masakrën e Gërdecit, nëse ka vullnet real për drejtësi në Shqipëri. Në një intervistë për librin e tij, me gazetaren Rudina Xhunga, ai u pyet gjerësisht edhe për Kosta Trebickën, një nga personazhet kyç ne denoncimin e aferës së Gërdecit, për të cilin Lawson beson se është vrarë. Në intervistë, autor i librit “Armët dhe çunat”, ka një apel për publikun shqiptar dhe gazetarët ku thekson se: “As qeveria shqiptare e djeshme dhe e sotme, as qeveria amerikane nuk janë të interesuara të dalë e vërteta. Madje as Hollivudi që ka bërë një komedi të zezë mbi rastin e as vetë New York Times. Vetëm njerëz që e duan Shqipërinë, mund ta shpëtojnë të vërtetën e kësaj ngjarjeje”.