Një mori qytetesh australiane janë mbuluar me shtresën më të trashë të borës në dekada, ndërsa moti i ashpër përfshiu lindjen e vendit. Deri në 40 cm borë ra në pjesët veriore të Uellsit të Ri Jugor të shtunën, sasia më e madhe kjo që nga mesi i viteve 1980, thotë Miriam Bradbury, një meteorologe në zyrën e motit të Australisë. Ajo shton se pjesë të shtetit fqinj Queensland gjithashtu panë borë për herë të parë në 10 vjet. Shërbimi Shtetëror i Emergjencave të Uellsit të Ri Jugor tha se bora e paparë, e shoqëruar me shi të rrëmbyeshëm dhe stuhi në pjesë të tjera të shtetit, ka çuar në më shumë se 1,455 incidente gjatë fundjavës. Këtu përfshiheshin më shumë se 100 automjete të bllokuara në rrugët kryesore dhe dhjetëra mijëra shtëpi që humbën energjinë elektrike. Një operacion kërkimi ndërkohë po vazhdon për një grua 26-vjeçare e cila u përfshi nga ujërat e përmbytjeve në rajonin e Luginës Hunter, pasi drejtuesja e një makine në të cilën ajo udhëtonte u përpoq të kalonte mes ujit, tha Policia e Uellsit të Ri Jugor.