Në Moskë nis gjykimi ndaj 19 personave që akuzohen për përfshirje në sulmin në sallën e koncerteve në Moskë vitin e kaluar, kur u vranë 149 persona. Persona të armatosur hynë në sallën e koncerteve, Crocus City Hall, më 22 mars të vitit të kaluar, hapën zjarr dhe më pas ia vunë flakën ndërtesës. Ky ishte një nga sulmet më vdekjeprurëse në historinë e Rusisë. Qindra persona u plagosën. Grupi ekstremist, Shteti Islamik (IS) mori përgjegjësinë për sulmin vdekjeprurës. Katër sulmues të dyshuar, të gjithë nga Taxhikistani, një ish-republikë sovjetike në Azinë Qendrore, dhe 15 persona të tjerë akuzohen se kanë marrë pjesë në këtë sulm, dhe përballen tani me gjykimin. Tri seancat e para dëgjimore u zhvilluan javën e kaluar, sipas faqes së internetit të gjykatës në Moskë. Sulmi tronditi Rusinë, vendin që nisi pushtimin e Ukrainës fqinje në 2022. Pavarësisht se Shteti Islamik mori përgjegjësinë, Rusia e implikoi Ukrainën në këtë sulm, një akuzë që Kievi e quajti të pabazë dhe absurde. Gati gjysma e viktimave humbën jetën për shkak të thithjes së tymit dhe monoksidit të karbonit e jo nga armët e zjarrit, sipas agjencisë shtetërore ruse të lajmeve, TASS. Sulmi nxiti një valë ksenofobie ndaj migrantëve nga Azia Qendrore në Rusi.