Më shumë se 60 emigrantë kanë humbur jetën pas përmbysjes së një anijeje që transportonte rreth 150 persona pranë brigjeve të provincës jugore Abyan në Jemen, të dielën si pasojë e kushteve të këqija të motit. Sipas Organizatës Ndërkombëtare për Migracionin, deri tani janë konfirmuar 68 viktima, ndërsa 12 persona janë shpëtuar dhe dhjetëra të tjerë rezultojnë ende të zhdukur. Shumica e viktimave besohet të jenë shtetas etiopianë që udhëtonin drejt shteteve të Gjirit në kërkim të mundësive më të mira. Ky aksident tragjik ndodhi përgjatë një prej rrugëve më të rrezikshme të migracionit, që shpesh përdoret nga kontrabandistët e njerëzve për të kaluar migrantë nga Briri i Afrikës në Jemen. Organizata Ndërkombëtare për Migracionin e përshkroi situatën si “zemërthyese” dhe theksoi nevojën urgjente për mekanizma më të fortë mbrojtës për migrantët.