Kompania amerikane, Pfizer, është duke zhvilluar një vaksinë me kompaninë partnere nga Gjermania, BioNTech, për të kombinuar vaksinën aktuale kundër koronavirusit me një formulë tjetër, që do të shënjestrojë variantin Omicron të këtij virusi. Shefi ekzekutiv i kompanisë Pfizer, Albert Bourla, tha se formula e re e vaksinës, që do të shënjestrojë Omicronin, do të jetë gati për të kërkuar miratimin e rregullatorëve amerikanë në muajin mars. Duke komentuar edhe deklaratat e ekspertëve tjerë, Bourla ka thënë se vaksinat kundër koronavirusit mund të kthehen në doza të përvitshme, të ngjashme me ato të gripit stinor. Shefi ekzekutiv i kompanisë, Moderna, Stephane Bancel, tha javën e kaluar se njerëzve mund t’iu duhet edhe një tjetër dozë e vaksinës në vjeshtën e këtij viti. Qeveritë janë duke inkurajuar njerëzit që të vaksinohen dhe në disa raste edhe të marrin doza përforcuese për shkak të varianteve të reja të koronavirusit dhe zvogëlimit të efektit të vaksinave pas një kohe. Megjithatë, thirrjet për marrje të dozave përforcues në mënyrë të vazhdueshme, mund të kthehen në mision të vështirë, pasi ka persona që refuzojnë të marrin edhe dozat e para, e jo më dozat shtesë.