Policia italiane ka vënë në pranga dy shqiptarë, të akuzuar për trafikim të lëndëve narkotike. Policia e Shtetit, në koordinim me Prokurorinë Publike të Milanos, në kuadër parandalimit dhe luftimit të trafikut të drogës në qytet, arrestoi në flagrancë një shtetas shqiptar, 30 vjeç, pasi u kap me 1 kg heroinë dhe 100 gram hashash. Agjentët e Seksionit të Krimeve të cilët prej disa ditësh vëzhgonin një banesë në zonën e Mecenatit, kishin marrë disa denoncime për dy shtetas shqiptarë, të cilët dyshohej se ishin të përfshirë në trafikun e drogës. Policët vëzhguan lëvizjet e tyre për disa ditë, duke zbuluar se brenda një apartamenti të vogël, të dy kishin ngritur një laborator kushtuar përpunimit të heroinës. Të mërkurën, agjentët ushtruan një kontroll në banesën e tyre, ku gjetën gjithçka që nevojitet për përpunimin e drogës, përkatësisht tre makina me vakum, shtatë fole shishe hidraulike, peshore precize dhe shtatë thasë të zinj, me rreth 80 kg lëndë prerëse, e konstatuar më vonë të jetë paracetamol, dhe 4500 euro. Policia italiane bëri me dije se të gjitha këto materiale u sekuestruan. Në të njëjtën kohë, një tjetër grup policor arrestoi një tjetër shtetas shqiptar 30 vjeç, pranë shtëpisë së tij. Ky i fundit u arrestua në flagrance, pasi në banesën e tij u gjet e fshehur një kg heroine. Atij gjithashtu iu sekuestruan edhe 11.500 euro, të fshehura në komodinën e dhomës së gjumit.