Gjykata Kushtetuese ka shfuqizuar vendimin e firmosur nga kryeministri Rama në zgjedhjet vendore të 2019-ës, për shkarkim nga detyra të kryetarit të bashkisë Zef Hila. Në atë kohë rreth 250 militantë të partisë demokratike, i vunë flakën me bomba Molotov KZAZ-së numër 6 në Bushat, dogjën fletët e votimit si dhe plagosën tre efektivë policie. Faturën për këtë ngjarje e pagoi kryetari i bashkisë Zef Hila, i cili u shkarkua menjëherë nga detyra, për mosmarrje të një mase administrative. Në dokumentin zyrtar, Gjykata Kushtetuese parashtron disa vlerësime të cilat e çuan në vulosjen e verdiktit përfundimtar. Referuar këtij dokumenti, akuzat ndaj Hilës ndahen në dy grupe. Përsa i përket akuzave me natyrë penale, të tilla si dëmtimi me dashje apo zjarrvënie të materialeve zgjedhore, është kompetencë e Policisë së Shtetit dhe prokurorisë për të bërë ndërhyrje urgjente dhe jo e këshillit të ministrave, sipas vlerësimit të gjykatës kushtetuese.