Shembja e Teatrit Kombëtar prodhoi një debat të ashpër politik, në të cilin u përfshi edhe vetë presidenti Ilir Meta, teksa depozitoi në Gjykatën Kushtetuese, ende jofunksionale në atë kohë, dy padi. Njëra bënte fjalë për kalimin e truallit të teatrit nën juridiksionin e Bashkisë së Tiranës dhe tjetra për vendimin e rindërtimin, projektin dhe realizimin për të. Por, Gjykata Kushtetuese, e cila të paktën për këtë vit mund të konsiderohet e plotë edhe pse me vetëm 7 anëtarë nga 9 të tillë që duhet të jenë ka bashkuar në një të vetme dy paditë e presidentit Ilir Meta për Teatrin Kombëtar dhe ka vendosur që më 3 mars të mbahet seanca e parë e gjykimit. Kushtetuesja e ka marrë një vendim të tillë bazuar në thelbin e dy padive të kreut të shtetit, duke pasur edhe rezervën ligjore, si një argument, që në këtë rast lidhet me padinë për teatrit në tërësi, ndonëse me dy dosje, të dërguar veç e veç.