Rusia i tha Ukrainës në bisedimet e paqes të hënën se do të pranonte t’i je[te fund luftës vetëm nëse Kievi heq dorë nga pjesë të mëdha të territorit dhe pranon kufizime në madhësinë e ushtrisë së tij, sipas një memorandumi të raportuar nga mediat ruse. Kushtet, të paraqitura zyrtarisht në negociatat në Stamboll, nxorën në pah refuzimin e Moskës për të bërë kompromis mbi qëllimet e saj të hershme të luftës, pavarësisht thirrjeve të Presidentit amerikan Donald Trump për t'i dhënë fund "gjakderdhjes" në Ukrainë. Ukraina i ka hedhur poshtë vazhdimisht kushtet ruse duke thënë se ato janë të barasvlershme me dorëzimin. Delegacionet nga palët ndërluftuese u takuan për thuajse një orë, në raundin e dytë të negociatave që nga marsi 2022. Ata ranë dakord të shkëmbenin më shumë të burgosur lufte, duke u përqendruar te më të rinjtë dhe të plagosurit më rëndë si edhe të kthenin trupat e 12,000 ushtarëve të vdekur. Memorandumi rus, i cili u botua nga agjencia e lajmeve Interfax, tha se një zgjidhje e luftës do të kërkonte njohjen ndërkombëtare të Krimesë - gadishulli i aneksuar nga Rusia në vitin 2014, dhe katër rajoneve të tjera të Ukrainës që Moska i pretendon si territore të vetat. Ukraina duhet të tërhiqë forcat e saj nga të gjitha këto rajone. Ai përsërit kërkesën që Ukraina të bëhet një vend neutral, duke përjashtuar anëtarësimin në NATO, që ajo të mbrojë të drejtat e rusishtfolësve, ta bënte rusishten gjuhë zyrtare dhe të miratonte një ndalim ligjor për glorifikimin e nazizmit. Presidenti turk, Tayyip Erdogan, e përshkroi atë si një takim të shkëlqyer dhe tha se shpresonte të bashkonte Vladimir Putinin e Rusisë dhe Volodymyr Zelenskin e Ukrainës për një takim në Turqi me donald Trump. Por nuk pati asnjë përparim për një armëpushim të propozuar që Ukraina, aleatët e saj evropianë dhe Uashingtoni i kanë kërkuar Rusisë ta pranojë.