Gjykata Kushtetuese ka vulosur hapjen 100 për qind të listave të kandidatëve për deputetë të subjekteve politike. Këtë të mërkurë, trupa gjykuese ka shfuqizuar dhe vlerësuar si të papajtueshëm me Kushtetutën, pikën 3 të nenit 163 të Kodit Zgjedhor, duke eliminuar pragun e votave të nevojshme për të thyer herësin e për të kaluar në listë fituese. Sipas vendimit të marrë nga kushtetuesja, mandatet do të shpërndahen nga kandidati për deputet me më shumë vota tek ai me më pak vota. Fill pas përfundimit të numërimit të votave për zgjedhjet parlamentare, thyerja e herësit apo fitimi i mandatit nga kandidatë që kishin siguruar më pak vota se ata që ndodheshin jashtë listës së sigurt hapi jo pak debate. Ky vendim vjen menjëherë pasi Komisioni Qëndror i Zgjedhjeve ka certifikuar përfundimisht mandatet dhe emrat që do të ulen në Kuvendin e ri të dalë nga zgjedhjet e 25 prillit. Nëse kushtetuesja do të kishte folur më herët kandidatët socialistë si Mimi Kodheli, Ilir Beqaj apo Pandeli Majko si dhe kandidatët demokratë si Ivi Kaso do të ishin pjesë e parlamentit të ri të shtatorit. Megjithatë ky shfuqizim i kuadrit ligjor nga ana e Gjykatës Kushtetuese i lë detyrën parlamentit të ri të përgatisë amendamente ligjore që në zgjedhjet e ardhshme parlamentare, listat e kandidatëve për deputetë të jenë 100 për qind të hapura.