Një ngjarje tragjike është regjistruar në Itali, ku një çift udhëtoi për rreth 100 kilometra me djalin e tyre 31-vjeçar të pajetë në sediljen e pasme të makinës, pa e kuptuar se ai kishte ndërruar jetë. Sipas mediave italiane, familja me origjinë rumune po udhëtonte drejt Torinos në autostradën A21, në segmentin mes Casteggio dhe Vogherës. Babai ishte në timon, nëna në sediljen e pasme? ndërsa 31-vjeçari ishte ulur pas tyre. Prindërit menduan se djali ishte në gjumë. Gjatë udhëtimit ata tentuan disa herë ta zgjonin, por ai nuk reagoi. Vetëm pasi ndaluan në një zonë pushimi, prindërit kuptuan se 31-vjeçari nuk kishte puls. Ata telefonuan menjëherë numrin e emergjencës 112. Ekipet mjekësore mbërritën në vendngjarje, por nuk mundën të bënin asgjë tjetër përveçse të konstatonin vdekjen e të riut. Sipas dëshmisë së prindërve, djali kishte folur për herë të fundit rreth 100 kilometra më herët. Ata u thanë autoriteteve se ai kishte pasur probleme të lehta me zemrën. Hetimet vijojnë për të përcaktuar shkaqet e sakta të vdekjes, ndërsa dyshohet se 31-vjeçari mund të ketë pësuar një problem të papritur shëndetësor gjatë udhëtimit.