Të premten e 14 Janarit, Presidenti i Republikës Ilir Meta njoftoi se ka nisur procedurat për zgjedhjet e pjesshme vendore, duke i dërguar një kërkesë kreut të KQZ-së Ilirjan Celibashi për ta vënë në dijeni për vakancat në disa bashki të vendit. Ky vendim nga ana e kreut të shtetit vjen pak kohë para se Gjykata Kushtetuese të vendosë për shkarkimin e tij dhe në një kohë kur Partia Demokratike ndodhet në krizë, në betejën mes kryetarit Lulzim Basha dhe ish-kryeministrit Sali Berisha të nisur prej 9 shtatorit. Një akt befasues nga ana e Metës, pasi në Dhjetor, kur Gjykata Kushtetuese certifikoi zgjedhjet vendore të 2019-ës, presidenti pohoi se nuk kishte ndërmend të dekretonte një sfidë të re elektorale për bashkitë pa kryetar me arsyetimin se askush nuk ja kishte kërkuar ta bënte këtë gjë. Por, pse ky ndryshim 180 gradë nga ana e Presidentit Ilir Meta brenda pak kohësh? Duket se me këtë akt, kreu i shtetit ka qëllime të pastra politike. I pyetur nga gazetarët, nëse a do e shtynte datën e zgjedhjeve për bashkitë për kryetar nëse këtë gjë ja kërkonte kreu i PD-së Lulzim Basha, Meta u shpreh i prerë se nuk do të konsultohet me askënd.