Ndërtimi i një infrastrukture kulturore shqiptare jashtë vendit shihet me prioritet nga ministri Blendi Gonxhja. Në fjalën e tij në samitin për diasporën, ai u shpreh se po punohet për ndërtimin e qëndrave kulturore shqiptare nëpër botë ku të mësohet gjuha shqipe. Gonxhja: “Një tjetër aspekt i rëndësishëm është ndërtimi i një infrastrukture kulturore shqiptare jashtë vendit. Ne po punojmë së bashku me Ministrinë për Evropën dhe Punët e Jashtme, për krijimin e qendrave kulturore shqiptare në botë, të cilat do të funksionojnë si ambasada të kulturës sonë. Këto qendra do të jenë hapësira ku gjuha shqipe mësohet dhe transmetohet, ku arti shqiptar prezantohet dhe promovohet, ku traditat ruhen dhe përshtaten me kohën, dhe ku komunitetet shqiptare gjejnë një pikë referimi identitare dhe kulturore.”