“Marrëdhëniet me Kudretin i kishim shumë të acaruara. Sa herë unë tentoja të kontaktoja me fëmijet, ai vinte te puna e babit ose në shtëpi dhe na kërcënonte dhe thoshte se do më vriste.” Ka qenë kjo, dëshmia e Dhurata Saliaj, bashkëshortes së viktimës së atentatit që tronditit zonën e ish ekspozitës, mesditën e 4 qershorit, pas vënies në pranga nga efektivët e policisë. Dhurata Saliaj akuzohet si bashkëpunëtore e babait të saj Mexhet Picari, i cili vrau dhëndrin Kudret Saliajn dhe plagosi ish prokurorin Adriatik Cama, vetëm pak minuta para se të mbahej seanca gjyqësore e divorcit të viktimës me Dhurata Saliajn. Mësohet se vetëm pak minuta para krimit, Dhurata Saliaj, ka qenë e ulur në tavolinë bashkë me të atin, ngjitur me Kudret Saliajn. Gruaja ka tentuar t’i flaës të birit, i cili në seancën gjyqësore do të zgjidhte kujdestarinë e njërit prej prindërve. Mësohet se djali ka refuzuar të komunikojë me të ëmën, ndërkohë Dhurata dëshmon se është ofenduar nga viktima.